2 lalaki nagdala’g P4.7 milyon nga sigarilyo giposasan

2 lalaki nagdala’g P4.7 milyon nga sigarilyo giposasan

MOKANTIDAD sa P4.7 milyon ang nasakmit sa Task Force Davao nga mga ismagol nga sigarilyo sa pakigtambayayong sa Davao City Police Office ug Bureau of Internal Revenue (BIR) Davao Region.

Ang nahisgutan nakasakmit ang awtoridad niadtong Biyernes, alas 10 sa buntag, Marso 22, 2024 sa Davao City Entry Point sa Barangay Lacson, Calinan District, Davao City.

Sa report gikan sa TF-Davao, nasakmit sa awtoridad ang mga ilegal nga butang gikan kang alyas Edgardo, 32-anyos, minyo, ug alyas Johnrey, 30-anyos, minyo, pulos residente sa Kiblawan, Davao del Sur, sila sakay sa gray nga Mazda close van nga nagdala sa Plate# NFK 8239 paingon sa Davao City.

Nasakmit gikan sa ilang posisyon ang 150 ka kahon sa ilegal nga sigarilyo (50 reams matag kahon) nga adunay kinatibuk-ang 7,500 ka reams sa ismagol nga sigarilyo (100 ka kahon sa King Perfect ug 50 ka kahon sa New Berlin Menthol Cigarettes).

Sa maong kalampusan, si Task Force Davao Commander Colonel Darren E. Comia nagpasalamat pag-usab sa mga Dabawenyo, sa suporta ug kooperasyon.

Ang pagsakmit sa mga kontrabando nahimong posible tungod sa tip gikan sa usa ka concerned citizen nga nitaho sa maong ilegal nga transportasyon.

Ang mga suspek ug ang mga ilegal nga butang gitugyan dayon ngadto sa Bureau of Customs (BOC) Davao alang sa pagpasaka og kaso nga paglapas sa National Internal Revenue Code of 1997.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph