2 mortar nakaplagan sa junkshop

NAKURAT ang tag-iya sa usa ka junkshop dihang ilang napalgan ang duha ka mortar sud sa ilang junkshop sa Seaside 2, Barangay Matina Aplaya, Talomo District, Davao City.

Daling miresponde ang City Explosive and Canine Unit sa Davao City Police Office sa panguna ni Police Master Sergeant (PMSg) Mark Julius Adaptar, alas 7:30 sa buntag, niadtong Huwebes, Agosto 29, 2024.

Kini human nga nakadawat sila og tawag gikan sa barangay subay sa gipahibalo sa tag-iya sa junshop nga duna sila’y napalgan nga duha ka mga mortar.

Pag-abot sa mga personahe sa DCPO-CECU, nasuta nga usa ka 81mm mortar rounds ang duha ka mortar nga wala nay fuse ug explosive.

Anaa na sa kustodiya sa awtoridad ang nasampit nga mga mortar.

Panawagan sa awtoridad nga kung dunay makaplagan nga susama niini nga butang, dili hilabtan, dili dukdokon ug dili gabson, inay i-report sa barangay aron makapanawag dayon og awtoridad. (JPC)