2 nang-isnats og selpon, 1 dakpan

2 nang-isnats og selpon, 1 dakpan
Hulagway kuha ni Dexter Visitacion.

DAVAO DEL NORTE — Dakpan ang usa sa duha nga nang-snatch og selpon  didto sa Orchard  Road La Filipina, Tagum City alas 4 sa hapon, Huwebes, Disyembre 14, 2023.

Gibutyag nga ang biktima ginganlan og Philip Junel Trinidad, 21-anyos, ulitawo, call center agent ug molupyo sa Purok Bagani, Sacred Heart, Brgy. Cuambogan, Tagum City ang midangat sa Tagum City Police Station ug mitaho nga siya gitulis sa maong dapit.

Base sa inisyal nga imbestigasyon, nga samtang ang biktima nagpahangin sa dapit diin nahitabo ang insident, duha ka mga wala mailhing mga lalaki nga nag-angkasan sa singgol nga motorsiklo ang kalit nga mihunong sa nahimutangan sa biktima.

Matud pa nga usa sa mga suspek mition sa biktima og wa matinong kalibre sa armas ug pugsanong gikuha ang iphone 11 niini.

Pagkahuman ang mga suspek nagdaling nangagiw palayo paingon sa wala masayring direksyon apan, giingon nga ang biktima nakahimo pag-track kon pagsubay sa dapit nga nahimutangan sa selpon ug gilayon kining nagpatabang sa kapulisan.

Gibutyag nga sa pagkadawat sa maong taho, ang kapulisan sa siyudad sa Tagum uban sa lain pang mga yunit daling miresponde sa dapit diin natumbok ang nahimutangan sa selpon.

Daling gilusad nga hot pursuit operation didto sa Purok 6, San Juan, New Corella ug malampusong nasikop ang usa sa duha ka mga suspek nga nailhan sa pangalang Dominador Macahindog Villota, Jr. alias Teteng, 29-anyos, ulitawo nga Taga Purok 6, San Juan, New Corella.

Positibong giila sa biktima ang suspek nga maoy usa sa mga mitulis ug mikuha sa iyang selpon.

Ang maong dinakpan gikustodiya sa Tagum City Police Station alang sa tukmang disposasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph