DUHA patay, samtang pito ang samdan sa engkwentro tali managlahing grupo sa rebelde didto sa Maguindanao del Norte, alas 9:15 a.m., Marso 25, 2024.
Sa report gikan ni Maguindanao Del Norte Police Provincial Director Colonel Salman Sapal nga nagkaabot ang kampo nila Kumander Amin Salik sa Moro Islamic Liberation Front (MILF) ug Kumander Faisal Meto sa Moro National Liberation Front (MILF) sa Barangay Kakar, Barangay Dados, ug Barangay Bunged Datu Odin Sinsuat, Maguindanao Del Norte.
Halos tulo ka oras nga nagbinigwasay ang duha ka grupo, nga namingaw lang human mipatunga na ang mga lider sa Moro Fronts.
Giingong bangi tali magpamilya ang rason sa giyera sa duha ka kampo. Gibantayan na sab sa militar ang dapit aron di na masubli pa ang hitabo. (EEF)