COTABATO CITY — Tulo ka mga tawo, duha niini posibleng konektado sa Dawlah Islamiyah Terror Group, nadakpan sa ilegal nga druga sa highway checkpoint sa Datu Odin Sinsuat, Maguindanao del Norte alas 8 sa gabii, Disyembre 20, 2023.
Giila ang mga nadakpan nga sila si Adrian Quiambao nga taga Awang, Datu Odin Sinsuat; Juhair Salgan nga taga Palimbang sa Sultan Kudarat ug Norhamin Mangarin nga taga Barangay Nalilidan sa Kalamansig.
Nakuha gikan kanila ang P83,000 nga kantidad sa gituohang shabu.
Si Salgan ug Mangarin posibleng konektado sa Dawlah Islamiyah Terror Group sumala sa intel report.
Sa report sa PNP, gi-flag down ang tulo sa usa ka highway checkpoint dihang padung na unta sila mosulod sa Brgy. Poblacion sa Datu Odin Sinsuat.
Una nga nakadawat og report ang PNP kalabot sa ilang ilegal nga transaksyon ug nakomperma kini dihang nadakpan ang mga suspek nga dunay dalang dakong kantidad sa gituohang shabu.
Gibalhog ang tulo ka mga suspek sa custodial facility sa Datu Odin Sinsuat PNP sa Maguindanao del Norte ug mag-atubang sa tukmang kaso.