3 ka DCPO Director sud sa 1-adlaw

3 ka DCPO Director sud sa 1-adlaw
File photo

Posibleng matala rekord sa kasaysayan sa kapulisan

Nayagaw ang Davao City Police Office (DCPO) sa nahitabong mga katirakan kagahapon, Miyerkules, Hulyo 10, 2024, kung kinsa gyud ang ibutang nga city director sa buhatan.

Kini human nga gipanghulipan ang una nang gipahimutang nga 2 ka opisyal sa pulis aron nga maoy modumala sa DCPO.

Una mao si Police Colonel Lito Patay nga napahimutang isip ika-18 nga city director sa buhatan. Apan dangtan og upat ka oras ug 38 minutos, gihulipan gilayon siya ni PCol. Sherwin Butil nga gikan sa Police Regional Office-Regional Information and Technology Division (PRO-RITD) Davao.

Apan human sab sa tulo ka oras, gitangtang na sab siya ug gihulipan ni PCol. Hansel Matamis Marantan nga gikan sa kaulohang Manila isip acting DCPO director.

Kini base sa nadawat nga memorandum sa PRO-Davao nga nagdesignar kang PCol. Marantan nga maoy acting DCPO chief nga niepekto mismo kagahapon, Hulyo 10, 2024.

Gipaklaro sa memorandum nga si Marantan maoy mohulip kang Butil, ang pinakabag-ong gitudlo unta nga city director kagahapon sa buntag.

Si Butil sa pagkakaron maoy naggunit sa record nga acting city director sa DCPO nga nangatungdanan lang og tulo ka oras human sab sa upat ka oras sa unang natudlo nga si PCol. Patay.

Napahimutang si Butil isip acting DCPO chief nga wa miagi og opisyal nga turnover ceremony.

Sukad sa pagsulat ning balita, naghuwat pa ang PRO-Davao og mando gikan kang PRO-Davao director, Police Brig. Gen. Nicolas Deloso Torre III aron nga ang memorandum ipatuman.

Ang maong katikaran posibleng matala sab nga rekord isip pinakadaghang gihulipan nga city director sa kasaysayan sa kapulisan sulod lang sa usa ka adlaw.

Una niini, ang tigpamaba sa DCPO, Police Capt. Hazel Tuazon mipaambit sa impormasyon sa Davao media nga ang command conference gipahigayon dayon pipila ka minuto human sa appointment ni PCol. Patay.

Gisubli usab kini ni Tuazon sa Davao Peace and Security Press Corps niadtong Miyerkules.

Si Patay mao unta ang mohulip kang PCol. Rolando Suguilon kinsa gitudlo isip temporary officer-in-charge (OIC) niadtong Mayo 23, 2024 human sa kontrobersiyal nga pagrelibo ni Colonel Richard Bad-ang tungod sa nagpadayong "motu proprio investigation" nga gihimo sa Regional Internal Affairs Service-Davao Region kalabot sa kamatayon sa pito ka mga indibiduwal atol sa anti-illegal drugs operations nga gipahigayon gikan Marso 23 hangtud 26, 2024. (Uban sa taho ni Wenz G. Mendoza/JPC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph