KASONG kalapasan sa Republic Act 10591 o Comprehensive Firearms and Ammunition Regulation Act ang atubangon sa tulo ka mga tawo nga nadakpan sa awtoridad kay nagdala og mga bala sa pusil alas 6:10 sa gabii, Huwebes, Oktubre 3, 2024, sa Matalam, Cotabato Province.
Mga suspek giila nga sila alyas Norodin, alyas Omar, ug alyas Usop.
Sumala kang Cotabato Provincial Police Office Director Colonel Gilberto Tuzon nga nagpahigayon og joint checkpoint ang militar ug kapulisan sa Purok Daisy, Barangay Marbel, Matalam sa maong probinsiya.
Sa dihang niagi ang mga suspek sa checkpoint sakay sa open pipe Honda XRM nga motorsiklo, namatikdan sa mga awtoridad nga kadudahan ang ilang lihok.
Gipailawom dayon og inspeksiyon sa mga pulis ug sundalo ang sakay sa motorsiklo hinungdan nga nakuha sa U-box ang 460 ka bala sa M16 Armalite rifle.
Walay napakita nga papeles ang tulo sa ilang dala nga mga bala hinungdan nga gipangdakop.
Balhog ang mga suspek sa prisohan sa Matalam Municipal Police Station samtang naghulat sa tukmang kasong ipasaka batok kanila. (EEF)