GIPANGDAKOP ang 30 ka mga indibidwal human nga narondahan sa mga sakop sa Sta Ana Police Station kay nanggi-tagay pa kini og ilimnong makahubog bisan oras na sa liquor ban sa Davao City.
Sa mga hulagway sa Presinto 1 ang mga nahisgutan wala na kasibat dihang nakorner sa mga pulis ug sa mga auxiliary.
Sila kasohan og kalapasan sa City Ordinance 004-13 series of 2013 (Liquor Ban) human sila nadakpan alas 2:30 sa kaadlawon, Dominggo, Pebrero 25, 2024 didto sa Narra St. Brgy. 30-C, Davao City.
Sa report, nasayran nga giadtuan sa mga pulis ang maong bar kay adunay gika-report nga dunay natigayong kagubot sa gawas, dunay nag-inom og ilimnong makahubog bisan og lampas na sa oras nga gitugot sa pag-inom ug giingong saba kaayo, kadaghanan mga binabaye.
Sa pagpanguna ni Police Captain Rizalito Clapiz III ubos sa superbisyon ni PLt. Col. Ronald Lao, ang Station Commander sa Sta Ana PNP, gilayong gironda ang dapit.
"Pagsulod namo, nanagan na ang mga customers, nanago, nabilin pa ang mga bag, tsenelas, sandals, nila. Ang mga walay valid ID gidala namo sa station for verification. Kay dako baya na sa sulod murag balay, unya sige gihapon og serve og ilimnon maski lagpas na sa ban, ang uban ndakpan sad dili taga Davao mao wa kabalo abi nilag ok ra mag inom sa anang orasa," sumala ni Police Captain Clapiz III.
Dugang ni Clapiz nga mas daghan pa unta ang madakpan apan wa na matabang tungod kay nagdinaganay na ug nakasibat ang uban.
Ang mga nadakpan ang gipang-isyuhan og citation tickets.