GISUSPENSO ang mga klase sa upat ka mga barangay sa lungsod sa Tulunan, Cotabato Province human masinati ang pagbaha sugod alas 7 sa gabii niadtong Lunes, Nobyembre 20, 2023.
Matud ni Tulunan Mayor Reuel P. Limbungan nga gibaha ang mga ubos nga parte sa mga barangay sa Popoyon, Dungos, Galidan ug Minapan.
Ang pagbaha nunot sa kusog nga ulan hinungdan sa pag-awas sa mga kasapaan.
Gikanayon sa mga molupyo nga miawas ang usa ka dam nga nakapadugang sa taas nga lebel sa baha.
Dunay mga kabalayan nga gilunopan apil ang mga kabtangan, binuhing hayop ug mga pananum.
Abtik nga milihok ang mga sakop sa Municipal Disaster Risk Reduction Council (MDRRMC-Tulunan) ug giluwas ang mga naipit sa baha.
Nagpatuman ang Department of Education-Cotabato og clusterized class suspension sa Tulunan sa gibahaan nga mga barangay.
Samtang nagpaabot dayon og inisyal nga tabang ang LGU-Tulunan sa mga pamilya nga nabahaan.
