COTABATO CITY - Niresulta sa pagbaha ang padayong pagbunok sa uwan sa lungsod sa Matanog, Maguindanao del Norte. Gawas sa pagbaha, duna pa'y natala nga pagdahili sa yuta alas 7:00 sa gabii, Hulyo 9, 2024.
Base sa impormasyon nga nahipos sa local government unit (LGU-Matanog) gikan sa mga volunteers, barangay ug municipal officials, mga gibaha mao ang mga barangay sa Bugasan Sur, Bugasan Norte, Bayanga Norte, Sitio Campo Uno sa Sapad, ug Bayanga Sur.
Daghang mga motorista ang nakulgot sa Narciso Ramos Highway tungod sa kakusog sa baha ug nangatumba nga mga kahoy ug nibabag sa karsada.
Tungod niini, gitambagan sa lokal nga kagamhanan ang publiko nga magmatngon ug magmabinantayon sa palibot aron malikayan ang disgrasya.
Nanawagan usab ang lokal nga kagamhanan sa nagkalain-laing ahensya sa gobyerno sama sa Bangsamoro Autonomous Region in Muslim Mindanao, Provincial Government of Maguindanao del Norte, 15th Marine Brigade, Police Regional Office sa Bangsamoro Autonomous Region, ug tanang volunteer organizations sa pag-abag sa mga apektadong pamilya. (Edgar E. Fuerzas)