COTABATO CITY — Plano nga gideklara ilawom sa state of calamity ang lima ka lungsod sa Maguindanao del Sur nga gibaha niadto pang Huwebes sa gabii hangtud Biyernes, Oktubre 4, 2024.
Gibutyag ni Provincial Disaster Risk Reduction and Management Office(PDRRMO) Officer Tim Amboloto nga grabeng naapektuhan sa baha ang lungsod sa Ampatuan sa maong probinsiya.
Moabot sa 126 ka pamilya ang nanghikling gumikan sa katas-on sa lebel sa tubig-baha nga abot sa atop sa balay ilabi na kadtong duol sa mga kasapaan.
Naglisud sab sa pag-agi ang mga gagmay nga sakyanan sa national highway gumikan sa pag-awas sa Talisawa River.
Tungod sa kalawom sa lebel sa baha, abtik nga nagpahigayon og rescue operation ang PDRRMO-MDS sa mga molupyo nga naipit sa ilang mga kabalayan.
Gawas sa Ampatuan, gibaha sab ang mga lungsod sa Datu Abdullah Sangki, Mamasapano, Datu Saudi Ampatuan ug Datu Salibo.
Nagpaabot na og inisyal nga hinabang ang lokal nga panggamhanan sa Maguindanao del Sur sa mga pamilya nga apektado sa baha. (EEF)