NAGKAPULIKI sa pagpanghipus ang kapin 50 ka pamilya sa probinsiya sa Cotabato human sila gilampurnas sa kusog nga hangin, uban pa ang pag-ulan og ice, alas 2:45 sa hapon, Abril 3, 2024.
Saysay sa mga molupyo nga kalit lamang mibunok ang ulan sa maong adlaw, dayon mihaguros ang kusog nga hangin ug pag-ulan og ice.
Sa rekord, anaa sa 50 ka pamilya ang naapektuhan sa pag-igo sa buhawi sa napulo ka barangay sa Pigcawayan Cotabato.
Sila nakadawat na og ayuda gikan sa Department of Social Welfare and Development (DSWD)-Soccsksargen.
Si DSWD-Soccsksargen Director Loreto Cabaya Jr. ug Mayor Juanito “Totoy” Agustin nangulo sa pagpanghatag sa hinabang nga gipahigayon sa Municipal Lobby sa Pigcawayan.
Mga nanag-iya sa balay nga totally damage midawat og tag P10,000, samtang P5,000 sa partially damage.
Gipasalig ni Agustin nga gawas sa mga nangaguba sa ilang mga balay, mahatagan usab og ayuda ang mga molupyo diin mga pananom ang nadaot tungod sa paghapak sa kusog nga hangin ug ulan.