GIPOSASAN ang pito ka mga gituohang drug pushers ug users samtang usa ang nakasibat atol sa anti-illegal drug operation sa mga sakop sa Philippine Drug Enforcement Unit (PDEA) Davao ug National Bureau of Investigation-South Eastern Mindanao Regional Office (NBI-Semro)-Davao Region alas 7:25 sa gabii, Huwebes, Abril 11, 2024, sa Purok 6-B, Isla Verde, Barangay 23-C, Boulevard, Davao City.
Sa impormasyon nasayran nga ang target sa maong operasyon ang suspek nga si alyas Marlon, hamtong ang pangedaron ug residente sa maong dapit.
Ang suspek mapalitan na unta og gituohang shabu apan nakasibat sa dihang nakabantay nga awtoridad ang iyang katransaksyon.
Sa maong takna, nadiskubrehan sa PDEA ug NBI nga usa diay ka drug den sa maong lugar nga gipadagan sa suspetsado.
Apan, maayong pagkasikop sa gituohang mga kaubanan ug parokyano sa suspek.
Ang mga nadakpan mao sila alyas Monira, 28, co-drug den maintainer, ang mga bisita (parokyano) sa drug den nga sila alyas Eduard, 24, alyas Jun, 27, alyas Jel, 20, alyas Lando, 51, ug alyas Ron, 27.
Samtang gidala sa Southern Philippines Medical Center ang laing kauban sa mga suspek nga si alyas Makoy, 39-anyos, human napusilan kay kalit nga may gikuot sa iyang sling bag.
Nasakmit sa awtoridad ang mga nagkalain-laing gidak-on sa pakite unod ang gituohang shabu ug mga drug paraphernalia.
Giasikaso na ang tukmang kaso nga ipasaka batok sa mga suspek. (Jeepy P. Compio)