BALHOG karon sa Talomo Police Station ang usa ka delivery rider nga una nang nag-viral sa social media sa post nga pirte niyang hilak kay gi-hold up sa giingong duha ka mga lalaki samtang siya nag-deliver og parcel sa Sitio San Miguel, Barangay Catalunan Grande, Davao City, Biyernes sa udto, Enero 19, 2024.
“Hold-up Me”, suma sa Talomo PNP ang scheme sa suspek nga giila sa Davao City Police Office nga si Bryan Sistual Capote, 20-anyos, ulitawo ug residente sa Kulagsoy, Barangay Tacunan, Davao City.
Ang nahisgutang rider mi-report sa kapulisan nga siya kuno gi-hold up sa duha ka mga lalaki nga sakay sa motorsiklo diin gitiunan siya’g kutsilyo ug pusil dayon mideklara og hold-up.
Sigon sa rider nga natangag ang P17,000 niya nga collection ug pipila niya ka mga parcel.
Sa imbestigasyon sa Talomo PNP sa panguna sa hepe Police Major Rosario Aguilar, migula nga dunay usa ka testigo ang nagsaysay nga niadtong orasa ang rider naa atbang sa ilang balay.
Sumala sa testigo nga naghulat siya nga mahatud ang iyang parcel apan bisan tawag wala kini nadawat gikan sa naasoy nga rider.
Giingon sab sa testigo nga wala siya’y nakita nga kasamok sanglit duol ra kaayo iyang balay sa dapit diin asa suma pa nahitabo ang tulis.
Pipila sab ka mga residente nagbutyag sa samang obserbasyon sa naunang testigo.
Migula sa imbestigasyon nga nakita sa Talomo PNP nga sa pagsubay sa Gcash account sa rider diha sa fund transfer transaction history niini dunay nahitabo nga transfer sa kuwarta nga mokantidad og P17,464 nauna kaysa oras nga gideklara nga siya kuno gi-hold up.
Sa pag-interogar ngadto sa rider diin naa sab ang employer niini, mitug-an sa tinuod ang nasampit nga rider nga siya wala gi-hold up, kundi hinimo-himo lamang niya ang istorya nga siya gitulis sa duha ka lalaki.
Tungod niini, gipaslak sa prisohan ang suspek diin giandam na ang kaso batok kaniya sa korte.