AFP: Panimalos ang motibo sa MSU bombing

AFP: Panimalos ang motibo sa MSU bombing
Hulagway gikan sa PRO-BARMM.

MARAWI CITY - Panimalos ang gilantaw nga motibo sa mga awtoridad sa pagpamomba sa Mindanao State University (MSU) sa siyudad alas 7:20 sa buntag, Dominggo, Disyembre 3.

Giila ang mga suspek nga mao sila Arsani Membisa, alyas Khatab, Hatab ug Lapitos, giingong bomb expert ug Wahab Macabayao nga pulos mga sakop sa Daulah Maute Terror Group.

Kini mismo ang gikomperma ni Police Regional Office-Bangsamoro Autonomous Region in Muslim Mindanao Regional Director Brigadier General Allan Nobleza.

Una na nga gibutyag ni AFP Chief of Staff Lieutenant General Romeo Brawner nga panimalos ang motibo sa pagpamomba gumikan sa malampusong operasyon sa militar batok sa mga terorista sa Maguindanao del Sur ug Lanao del Sur.

Kahinumdoman nga onse ka mga miyembro sa Dawlah Islamiyah Philippine Terrorist ang napatay sa airstrike sa Joint Task Force Central sa Barangay Mother Tuayan, Datu Hoffer, Ampatuan Maguindanao del Sur niadtong Disyembre 1.

Sa operasyon, napatay ang usa ka Amir sa DI nga si Abdulrah Sapal, alyas Kumander Bro Sapal ug si Nasser Guinaid  Saptullah, alyas Kumander Nasserang, ikaduhang lider ug mao sab ang mohulip sa napatay nga si Kumander Abu Turaifie sa Bangsamoro Islamic Freedom Fighters (BIFF).

Patay sab ang duha ka lider sa Daulah Maute Terror Group sa Military Operation sa Lanao del Sur.

Misaka na sab sa 50 ang naangol apil ang mga outpatients samtang upat ang patay.

Natumbok nga improvised explosive device (IED) nga gama sa 60mm projectile ug RPG maoy gigamit sa mga terorista sa pagpamomba.

Sa kasamtangan nagdugang pa og puwersa ang militar ug kapulisan sa Marawi City samtang nagpadayon ang imbestigasyon sa Special Investigation Task Group Marawi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph