ANAA na sa 17 ang ihap sa namatay sa aksidente tali sa van ug trak sa Cotabato niadtong alas 12:40 p.m. sa Lunes, Marso 25, 2024 .
Ang mga namatay sa aksidente giila nga sila Mark Anthony Bunda, 26-anyos, ulitawo, drayber sa Van; mga pasahero nga sila Irish Lopez, 30, Mary Jane Lopez, 52, minyo; Genevieve Vicente, 58, biyuda; Kimberly Armada, 20, dalaga, estudyante; Xian Gellantilay, 5 anyos; May Grace Aaron, 38; Perse Veranda Balolong, 73; Ernesto Balolong Sr., 82; Shirley Pojas, 28, dalaga; Maricel Ambay Castillon, 40; Ryse Vince Lopez Suan, 6, pulos mga molupyo sa Antipas Cotabato; Winston Romano Sorsano, 40, nagpuyo sa San Marino Block 7, Lot 16, Das Mariñas, Cavite; Michael Jason Heguinto, 27, nagpuyo sa Barangay Linao, Matalam, Cotabato; Virginia Wayno Rufino, taga Purok 6, Barangay Sarayan, Matalam Cotabato; ug duha ka patay'ng lawas nga wala pa mailhan.
Samtang ang mga angol mao sila Rosario Lopez Reyes, kanhi kapitan sa Barangay Luhong Antipas Cotabato nga sakay sa van; Edwin Dumapias Nasiad, drayber sa 10-wheeler dump truck nga molupyo sa Purok 2, Barangay Tulungan, Guihing, Davao Del Sur; Wilmark Josol Panoy, 27, helper nga nagpuyo sa Purok Batangueño San Jose Digos City; ug Gregorio Wallace Casiño, 53 anyos.
Ang van gikan sa lungsod sa Antipas paingon sa Kidapawan City, apan pag-abot sa Purok 2, Barangay Luhong sa lungsod sa Antipas, gidaro kini sa kasugat nga dump truck nga giingong nawad-an og brake.
Ang van nagguyod og baynte metros dayon midilaab maong nangasunog ang mga sakay niini.
Sa pagkakaron, si Cotabato Police Provincial Director Colonel Gilberto Tuzon maoy nangulo sa imbestigasyon sa duguong aksidente sa lungsod sa Antipas. (EEF)