NAILOG sa otoridad ang bata nga gidagit sa katabang alas 6:15 sa buntag, Huwebes, April 11 sa siyudad sa Cotabato.
Ang biktima mao si Adrianna Xyriel Mamasabulod Guimal nga molupyo sa Barangay Layog Pagalungan Maguindanao Del Sur.
Ang suspek nga katabang ra nila mao si Zaira Sinempalan, 30.
Una na nga gibutyag ni Maguindanao Del Sur Police Provincial Director Colonel Roel Sermese nga alas 5:20 sa buntag, Miyerkules, nasiplatan ang katabang nga misakay og traysikel uban ang bata paingon sa public terminal sa Pikit, Cotabato, diin misakay na sab kini og van paingon sa Cotabato City.
Alang sa paspas nga pagkakita sa bata, mitanyag ang pamilya Guimal og P100,000 nga reward money sa makatabang kanila nga matultulan ang katabang.
Ang bata apo ni Pagalungan Mayor Datu Salik Mamasabulod ug pag-umangkon ni Vice Mayor Abdilah Mamasabulod.
Suma pa nga samtang nagpangita ang otoridad ug pamilya sa bata, nakadawat sila og text message gikan sa paryente sa katabang nga nagkanayong iuli na niini ang bata.
Dali kini nga giadtuan sa otoridad ang lugar ug gikuha ang bata.
Giingong nagkasinabot ra ang pamilya sa bata ug sa katabang nga sulbaron ang isyung nahitabo. (Edgardo E. Fuerzas)