PATAY ang usa ka lalaking nagbitbit og armas human misukol sa pulis dihang gipangutana kon unsa ang nagbukol sa iyang kilid.
Sa report, nakadawat og impormasyon ang Paquibato Police Station labot sa usa ka lalaki nga nagbaktas-baktas sa may Sitio Malipaga, Barangay Malabog, Paquibato District, Davao City nga may sukbit nga armas.
Ang lalaki suma sa misumbong nakasuot og light green sweat shirt ug camouflage short.
Dali nga giadtoan sa mga sakop sa Police Station 7 ang lugar ug nakita ang lalaki nga sama sa paghulagway sa concerned citizen.
Ang lalaki nga wala pa mailhi giduol sa pulis ug gipangutana, apan inay motahan sa kaugalingon milugnot kini, gipusil ang pulis.
Wa maigo ang otoridad, diin mibalos ang usa ka pulis ug naigo ang suspek nga nailhan nilang si Jessie Guirero Daño, 37, taga Purok 28, Balagbag, Barangay Malabog, Paquibato District, Davao City.
Ang suspek human maigo nahug sa pampang nga miresulta sa iyang kamatayon.
Nakuha gikan sa posisyon sa suspek ang homemade .38 caliber revolver nga may bala ug balinis. (RGV)