NAGTAKDA ang Ancillary Services Unit (ASU) og petsa ug mga lugar alang sa hiniusang pagpanglimpyo sa kadalanan padulong sa mas naghuot nga lugar sa Davao City aron nga maseguro nga sayon lang ang pag-agi panahon sa emerhensiya o motubag nga mga sakyanan panahon sa kalamidad o sunog.
Gikanayon ni ASU head Paul Bermejo, atol sa I-Speak media forum niadtong Marso 7, 2024, nga ang halapad nga hiniusang clearing team nagtumbok na karon sa laing mga lugar human niini nalimpyohan ang mga dalan sa San Pedro padulong sa Bucana ug San Pedro padulong sa Ubalde niadtong Pebrero.
Ang paglimpyo sa mga kadalanan gitakda sa Marso 13 sa Aquino SIR ug Daang Patnubay; Marso 17 sa Jacinto St. Guerero, Magsaysay, Sales hangtud sa Luna St; Marso 20 sa Barangay 5-A, Datu Bago Street, Rasay Street padulong sa Fr. Selga; ug March 24 sa Leon Garcia, Sta. Ana, Fernandez St., ug Monteverde, nahimutang sa Barangay 27-C.
Gisulti ni Bermejo nga apil sa nalimpyohan sa mga nakaharang sa dalan atol sa niaging mga operasyon mao ang ekstensiyon sa mga lamesa ug lingkuranan sa mga karenderya, mga gamit konstraksiyon, traysikad, single nga motorsiklo, ug pribadong behikulo nga giparada sa kadalanan.
Dugang pa sa opisyal nga ang tumong sa pagpanglimpyo aron nga kadalanan magamit og sakto isip agianan.
Hinuon, gitataw ni Bermejo nga mga molupyo sa maong dapit gidasig nga boluntaryo na lang nga manglimpyo sa aseras tungod ang ilang team magguba o magsakmit sa mga nakababag nga mga butang sa dalan sa maong gitakdang mga adlaw. (City Information Office-Davao)