Bana naay 5 kadidang; 2 gi-motel

DAW nahugno ang kalibutan sa usa ka asawa dihang iyang nabasahan ang Messenger sa iyang bana nga dunay lima ka babaye nga ginasungkab, diin ang duha niini higala kaayo niya.

Alas 3 sa hapon niadtong Miyerkules, Hulyo 10, 2024, gipa-blotter ni alyas Mercy, 46, taga Barangay 76-A, Bucana, Davao City ang hitabo, diin gusto niyang ipatawag sa barangay ang duha niya ka mga higala nga nalambigit sa iyang bana nga si Roger, 47.

Nasayran nga dihang hubog ang iyang bana, giutingkay niini ang cellphone sanglit wala kini passcode.

Giusa-usa og basa ni Mercy ang mga chat sa iyang bana, diin didto iyang nabasahan ang panagkita sa iyang bana ug sa usa niya ka higala nga babaye sud sa usa ka motel sa dalang Claveria Davao City.

Ang usa sab ka babaye nga higala ni Mercy nagkita na sab sa iyang bana niadtong Hulyo 1, 2024 sa samang motel subay sa ilang conversation sa Messenger.

Dihang gikompronta na ni Mercy ang iyang bana, nasuko kini ug gibundak ang cellphone hinungdan nga nabuak ug dili na moandar.

Nadapatan sab si Mercy sa iyang bana, hinungdan nga mipapulis kini samtang gipatawag ni Mercy ang duha niya ka mga higala sa barangay.

Nakatakda sab nga modangop sa Davao City Police Office Women and Children’s Protection Desk ang nadapatan nga asawa sa iyang bana. (Jeepy P. Compio)