POSIBLE nga nakatulog ang drayber sa wing van truck nga nadisgrasya atubangan sa barangay hall sa Barangay Marilog Proper ala 1:20 sa kaadlawon, Lunes, Enero 15, 2024, sa Barangay Marilog Proper, Marilog District, Davao City.
Sa maong hitabo, nabugtoan sa kinabuhi ang helper sa trak, samtang ang drayber nga giilang si Romeo Monteverde Jr., 40 anyos, daling gidala ngadto sa Southern Philippines Medical Center (SPMC) dihang nahaw-as kini mga alas 2:30 sa kaadlawon.
Subay sa imbestigasyon, migawas nga samtang naglawig sa maong dalan ang wing van truck gikan sa Bukidnon paingon sa Davao City, pag-abot sa kurbada nga bahin sa maong lugar, nawad-an og preno ang wing van.
Sa maong hitabo, nibangga kini sa duha ka mga sakyanan sa barangay nga nakaparada sa gawas ug naangin pa ang mga kable sa kuryente.
Sumala sa awtoridad nga posible nga nagduka ang drayber samtang nagmaneho, diin pahimangno sa kapulisan nga kung giduka, mamahimo una nga mohunong sa kilid sa kalsada ug motagpilaw.
Naipit sulod sa trak ang drayber ug ang helper niini diin mga alas 2:30 na nahaw-as gikan sa trak ang drayber samtang mga alas 4 na sa buntag nakuha ang helper kinsa wa nay kinabuhi. (Jeepy P. Compio)