Bangga sa motor; 1 patay, 2 angol

Bangga sa motor; 1 patay, 2 angol
Hulagway gikan sa Midsayap Municipal Police Station.

KIDAPAWAN CITY - Nagpasidaan karon ang lokal nga panggamhanan sa Midsayap, Cotabato Province ug Midsayap Municipal Police Station ngadto sa mga nagmaneho og motorsiklo nga mag-amping kanunay ug hinay-hinay lang sa pagpadagan aron nga malikay sa disgrasiya. 

Kini human nga usa ka negusyante ang namatay samtang laing duha ang naangol sa nahitabong bangga sa duha ka motorsiklo alas 7:20 sa gabii, Dominggo, Pebrero 25, 2024.

Giila ang namatay nga si Rey Velasco, 62, minyo, ug nagpuyo sa Barangay Bual Sur, Midsayap, North Cotabato samtang angol sab sila Edrian Dumelod ug Ronelo Adolfo Jr., pulos taga Aleosan sa maong probinsiya. 

Matud ni Midsayap Chief of Police, Lieutenant Colonel John Miridel Calinga, nga sakay si Velasco sa iyang gimaneho nga Yamaha Mio, kolor itom, nga dunay plaka MA13206 ug paliko na sa Crossing Bual Sur sa Midsayap.

Apan matud pa kalit kining gibanggaan sa nagsunod nga Honda CRF 150 nga motor nga gimaneho ni Dumelod.

Tungod sa kakusog sa impak, nangalagpot ang mga sakay sa motorsiklo ngadto sa kalsada ug daling gisapupo sa nagresponde nga Rescue Unit sa Midsayap ug gidala ngadto sa balay tambalanan.

Apan giingon nga si Velasco namatay human makaangkon og grabeng bali ug pangos sa lawas ug nabunal pa ang ulo niini sa semento nga wala magsul-ob og helmet.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph