GILUTOS na karon sa Joint Task Force Central ang grupo sa mga terorista nga ilang nakaengkwentro, kadlawon, Marso 23 sa probinsiya sa Maguindanao Del Sur, diin napatay ang usa nila ka lider.
Napatay giila nga si Abu Halil, training officer sa Bangsamoro Islamic Freedom Fighters (BIFF-Karialan Faction), igsuon ni Khadafi Abdulatif, chief of staff sa BIFF-KF.
Saysay ni Brigadier General Jose Vladimir Cagara, commander sa 1st Brigade Combat Team, nga nagpahigayon sila og operasyon batok sa BIFF sa Sitio Binakuyan, Barangay Lower Salbu, Datu Saudi Ampatuan, Maguindanao Del Sur dihang naka-engkwentro nila ang grupo ni Halil.
Human ang pila ka minuto nga binakbakay narekober sa otoridad ang patay nga lawas ni Kumander Hali, apil na ang dala niyang M16 Armalite Rifle, bala ug magazine.