Dabawenyo naglibog kinsay nagsulti'g tinuod

PIPILA ka lungsuranon namahayag nga naglibog na sila kinsa’y tuohan sa duha ka kampo sa nagpadayong isyu batok Police Regional Office (PRO) Davao Region ug Kingdom of Jesus Christ (KOJC) sa pagpangita sa founder niini nga si Pastor Apollo C. Quiboloy.

Ang usa ka manikyurista sa usa ka salon sa Davao City nagsaysay nga naglibog na siya sa duha ka kampo, nag-iyahay kuno og panghunaw.

“Nanggihunaw man sila oi, libog kaayo kinsay nagsulti’g tinuod ana nila, samok nga isyu,” ingon ni Sherly Enciso, 45-anyos, taga Barangay 33-D, Davao City.

Una niini, ang PRO-11 namahayag nga misubay sila sa tanang anggulo sa pagsunod sa tawhanong katungod ug wala sila’y nalapas sa balaod.

Sumala ni PRO-11 spokesperson Police Major Catherine Dela Rey nga dili ug wala kuno sila mihimo og pamutol og suga ug tubig sa KOJC compound.

Gani, mituman sab sila sa Temporary Protection Order nga gipagula sa korte pinaagi sa Regional Trial Court (RTC), Branch 15 sa Davao.

Martes sa buntag, Agosto 27, 2024, ang Legal Counsel sa KOJC nga Atty. Israelito Torreon, nag-file og Temporary Restraining Order/Injunction versus nila PNP chief General Rommel Francisco Marbil, PRO-11 director Brigadier General Nicolas Torre III ug ni Davao City Police Office (DCPO) director Police Colonel Hansel Marantan ug pipila ka mga police officers.

Sa usa ka press conference kagahapon sa hapon sa kampo sa KOJC, ilang gi-usa usa ang mga kalapasan sa mga pulis atol sa ilang gihimong pagsulod sa KOJC compound nga gipangunahan ni PRO-11 director Brigadier General Nicolas Torre III.

“Isi’g limpiyohay man sila, dili nako masabtan ilang magubot, ang lintunganay aning tanan, ipagawas na nila ilang lider sa simbahan, atubangon ang kaso, kung tinuod na o dili, moatubang, dili motago aron walay samok, daghan pa hinuon ang nadamay,” ingon sa usa ka negusyante og karne sa Agdao Public Market, Davao City nga si Edgar Recaforte, 56-anyos.

Human migula ang "cease and desist" order gikan sa korte, mga miyembro sa KOJC nangalipay ug ilang gipanghangop ang mga pulis nga naa sulod sa KOJC compound, nga usa sa mga eksena sa mga nag-trending nga hulagway.

Ang hulagway nagpakita sa kalipay sa mga miyembro sa KOJC, ilang gihangop ang pulis ug nalipay sab ang pulis.

Apan, bisan pa man nga daw nakalma na ang tanan, sumala sa PRO-11 dili sila mohunong sa pagpangita kang Quiboloy, butang nga mao sab ang giluwatang pamahayag ni Department of Interior and Local Government (DILG) Secretary Benjamin Abalos, Jr.

Kagahapong adlawa, samtang gisuwat kining balita alas 3 sa hapon, padayong nagpahigayon og press conference ang kampo sa KOJC pinaagi sa ilang legal counsel nga si Atty. Torreon. (JPC)