Dalagita gitagud-tagod og tigbas

NATAGUD-tagod sa mga samad tinigbasan ang lawas sa 14-anyos nga dalagita dihang napalgang patay sulod sa gipuy-ang balay sa Purok 5 , Barangay Cabadianan, Nabunturan alas 12:01 sa tungang gabii, Agosto 28, 2024.

Ang biktima giila nga si Juliet Madalo Quiambao, estudyante, dalaga, ug molupyo sa nahisgutang dapit.

Sa gihimong pakipaghinabi sa Superbalita Davao sa amahan sa biktima nga si Carlito, 51-anyos, gisaysay niini nga ang inahan sa biktima atua sa laing nasud nanarbaho ug niadtong higayona nabilin nga nag-inusara sa balay ang biktima nga iyang anak sanglit ang maong amahan uban sa iyang mga higala ug kauban sa trabaho nagtagay og inom human nagpaayo og chainsaw hinungdan nga wa dayon makauli sa balay.

Samtang ang maguwang lalaki sa biktima nga ginganla'g April James, 16-anyos natulog sa balay sa ilang uyoan.

Matud pa nga alas 12:00 sa tungang gabii dihang miuli sa balay ang amahan gikan nagtagay og inom sa mga higala. Sa pagsulod sa balay, maoy misugat ang patay’ng lawas sa anak nga nagbuy-od sa salog samtang naglunang sa kaugalingong dugo.

Gisulti sa amahan nga wa sila’y nakabangi o nakaaway nga tawo labi na ang biktima hinungdan nga natingala siya kung nganong gipatay ang iyang anak sa niluog nga paagi.

Nakahiagom og samad tinigbasan sa nagkadaiyang parte sa lawas ang biktima ug ang liog, sumala pa, gigulgol ug hapit na maputol.

Mga nakaila sa biktima nasubo sa hitabo sanglit giingon nga ang biktima usa kini ka atleta sa ilang tunghaan.

Ning kasamtangang usa ka makuting imbestigasyon ang gihimo sa mga kapulisan sa Nabunturan Municipal Police Station sa tinguha nga mailhan ug madakpan ang responsable sa kamatayon sa dalagita. (DTV)