Subling giawhag sa Davao City Disaster Risk Reduction Management Office (CDRRMO) ang tanang mga barangay nga mohimo og mas aktibong papel sa pagpangandam sa katalagman pinaagi sa pagpahunong sa mga bag-ong mamumuyo sa pag-okupa sa mga lugar nga giilang "hazard-prone areas".
Kini human nga mga pagbaha ug pagdahili sa yuta nga nasinati tungod sa shear line weather system niresulta sa kamatayon ug pagkaguba sa mga "high-risk areas" sa dakbayan. Ang maong kahimtang sa panahon niresulta sab sa pagpamakwit sa gatusan ka mga pamilya nga nanimuyo sa duol sa kasapaan ug mga lugar nga sagad mahitabo ang landslide.
Sa inisyal nga taho sa DRRMO nga nagpadayon pa sa Rapid Damage Assessment and Needs Analysis (RDANA), sukad Enero 24 mga pagbaha nahitabo sa Poblacion, Talomo, Buhangin, Toril, Bunawan, Marilog, Tugbok, Calinan, ug Paquibato ug nagdislokar og 411 ka pamilya.
Base sa samang taho, ang landslide sa Catalunan Grande, Tigatto, Salaysay, Dalag, Marilog Proper, ug Magsaysay nikalas og duha ka kinabuhi ug nakadislokar og mga ka 70 pamilya.
Laing 14 ka pamilya sa Awhag Village, Barangay 19-B nadislokar sab tungod sa landslide.
Gitug-an ni Maria Cristina Sunga-Villegas, Acting Head of CDRRMO Research and Planning, nga kining naapektuhan nga mga lugar dugay nang giilang danger zones. Mga opisyales sa barangay ning mga lugar gipahibawo nang daan sa kapeligro ug gibansay aron nga maandam sa posibleng paghapak sa kalamidad. Giingnan na sab ang mga barangay nga ipahunong na ang daghang mga tawo nga mamuyo sa maong lugar tungod sa peligro.
Apan bisan pa ang mga pahimangno gikan sa CDRRMO, mga tawo padayon nga nagpuyo sa mga danger zones.
“So, again, manawagan ko sa atong mga barangay officials […] na kung pwede mao pa lang pagtukod sa poste, kung kabalo na sila na dili na diha pwede tukuran and mabutang ilang kinabuhi sa danger, automatically ipa-stop na gyud na sa barangay,”pahayag ni Sunga-Villegas.
Iya sab nga gitambagan kadtong mga naapektuhan sa landslide nga di na mamalik sa ilang mga lugar. (Uban sa taho sa CIO-Davao)