GIBUTYAG ni Davao City Mayor Sebastian “Baste” Duterte nga ang dakbayan nihatag og tabang ngadto sa Bicol, nga maoy grabeng naapektuhan sa Bagyong Kristine.
Atol sa iyang pag-atubang sa Basta Dabawenyo niadtong Dominggo, Oktubre 27, 2024, gikanayon ni Duterte nga ang local government unit (LGU) sa Davao naghatag og tabang sa mga lugar sa Pilipinas nga naapektuhan sa mga bagyo.
Gisulti niya nga bisan tuod kung daghang mga tawo niangkon nga ang tabang sa siyudad dunay bulok politika, bisan niini nga opinyon, ang dakbayan magpadayon sa paghatag og suporta kay mao na man ni ang gibuhat niya sa dugay nang panahon.
Dugang pa niya nga ang siyudad magpadayon sa pagtunol og tabang ngadto sa mga molupyo sa maong rehiyon aron nga makatabang sa ilang pagrekober sa mga danyos nga dala sa bagyo. Gisiguro niya nga ang siyudad dunay igong pundo sa ilang calamity fund.
“Ang problema karon usahay lainon nila ang tan-aw, ingnon nila nga politika na pud pero regardless og unsa man na ilang isulti mopadala gyud ta og tabang kay naa man tay ikatabang,” pagseguro sa mayor.
Naglaum si Duterte nga ang tabang sa Davao City ngadto sa mga naapektuhan sa bagyo maghatag og inspirasyon sa uban pang mga LGUs nga motabang usab, kay kinahanglan nga motabang sila isip usa ka nasyon. Gipahimug-atan niya nga ang mga tawo di molahutay kung way suporta.
Samtang gipadayag sab ni Konsehal Pilar Braga nga ang paghatag og tabang niadtong naapektuhan sa bagyo mao ang “right thing to do.”
“Tutok usa ta sa mga katawhan nato nga kaluoy kaayo ang ilang kahimtang didto,” awhag niya.
Kahinumdoman, nga gitaho ni Office of Civil Defense Administrator Undersecretary Ariel Nepomuceno nga ang ihap sa namatay tungod sa Bagyong Kristine nitaas ngadto sa 85, uban ang 41 indibiduwal nga nangawala. Mga namatay ang gitaho gikan sa Calabarzon (Region 4A), Bicol, Zamboanga Peninsula, ug Central Luzon.
Giingon nga ang Bagyong Kristine maoy pinakakusog nga weather system sa nasud ning 2024, nilabaw pa sa 48 ka mga nangamatay nga natala tungod sa hiniusang epekto sa Bagyong Butchoy ug Carina niadtong Agosto. (RGP, TPM)