Dili mo-amot sa tagay, gidunggab

Dili mo-amot sa tagay, gidunggab
Hulagway gikan sa Wikipedia.

DAVAO DE ORO — Nadakpan ang vendor nga maoy giingong midunggab sa katagay niya’g inom nga misumbag kaniya ug mikulata didto sa Purok 4, Brgy. Poblacion, Laak alas 10:30 sa buntag, Dominggo, Disyembre 3, 2023.

Ang biktima giila nga si alyas James, 28-anyos, ulitawo, walay trabaho ug molupyo sa Purok Marigold, Brgy. Mamangan, San Isidro.

Subay sa report, ang biktima gidunggab sa suspek nga ginganlan og alyas Mario, 43-anyos, minyo, vendor nga molupyo sa Purok 3, Brgy. Sta Emelia, Laak.

Base sa imbestigasyon, ang biktima ug ang suspek nagtagay og ilimnong makahubog apan, taliwala sa tagay, gisumbag ug gikulata sa biktima ang suspek hinungdan nga gidunggab sa suspek ang biktima gamit ang mahait nga hinagiban diin maayong pagkaigo sa tiyan ug apapangig.

Gika-ingon nga nasuko ang biktima dihang dili na suma pa mo-amot ang suspek aron ipalit og dugang ilimnon.

Ang biktima gidali pagdala sa Davao De Oro Provincial Hospital-Laak aron siya matambalan apan, wa madugay gibalhin pagdala sa Davao Regional Medical Center sa siyudad sa Tagum alang sa dugang medikasyon.

Ang suspek anaa karon sa kustodiya sa Laak Municipal Police Station alang sa tukmang disposasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph