Diskartihay pagsaka sa presyo sa LPG

Diskartihay pagsaka sa presyo sa LPG
Hulagway iya sa nolisoli

DAGHANG mga tag-iya og karenderya sa Davao City ang nangita karon og mga pamaagi unsaon sa pagsugakod sa bag-ong pagsaka sa presyo sa liquefied petroleum gas (LPG) nga nakaapekto sa ilang mga patigayon.

Si Son-son Maitum, tag-iya og karenderya sa Panacan, Davao City, nakakita og estratihiya isip tubag sa pagsulbong sa presyo sa LPG - sa paggamit og kahoy sa pagluto inay magsalig sa LPG. Matud niya nga dali ra siyang makapalit niini gikan sa iyang mga silingan o bisan manguha og mga kahoy subay sa sapa duol sa iyang puwesto.

“Taas na kaayo ang presyo sa LPG, diskartihan na lang ni og kahoy kahoy, manguha ra ko sa sapa, naay mga gapnod-gapnod, okay na to,” butyag ni Maitum sa paghinabi uban ang SunStar Davao.

Si Jestoni Polong, laing tag-iya og kan-anan sa Buhangin ning siyudad, nagsulti nga naggamit na sa ilang tinigom aron nga makapalit og LPG ug laing gikinahanglan nga mga lamas. Apan wala sila magpataas sa presyo sa ilang mga pagkaon sa kasamtangan.

“Kapoy na kaayo magtaas, tas malugi mi hinoon, dili na lang namo tas-an ang presyo sa sud-an. Usa pa, daghan man gihapon nagakaon sa amoa so okay ra,” matud niya.

Gitaho nga mga panimalay maglaum sa taas nga presyo sa LPG karong tuiga.

Kini human nga ang Petron nagpahibalo nga dunay pagtaas sa presyo niini nga P0.45 matag kilogramo nga niepekto gikan 12:01 sa kaadlawon sa Nobyembre 1, 2023. Nitaas ang presyo sa LPG og P0.50 per kg. samtang ang Petron ug Solane-branded LPG nitaas og P0.45 per kg. niepekto niadtong Nobyembre 1.

Ang maong paglihok tugbang sa P4.95 nga pagtaas sa presyo sa 11-kilogramo nga LPG cylinder.

Kini sumala pa sa international contract price sa LPG alang ning bulana. Ubang mga kompaniya wa pa magtakda sa pagtaas sa presyo sa ilang LPG. Uban sa taho gikan sa PNA.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph