DUHA ka posisyon ang gipilian nga posibleng daganan ni kanhi Presidente Rodrigo R. Duterte sa Mayo 2025 national and local elections.
Kini ang gibutyag ni kanhi Chief Presidential Legal Counsel Atty. Salvador Panelo sa SMNI, "Gikan sa Masa, Para sa Masa" Miyerkules, Oktubre 2, 2024.
Sumala ni Panelo nga ang gipilian ni FPRRD mao ang pagka-senador ug pagka-mayor sa Davao City.
Si Panelo nagbutyag nga kinahanglan suma pa modagan ang kanhi pangulo luyo sa mga wala ug tuo nga mga isyu nga nanghitabo.
Una niini, nabutyag sa media nga dunay matigayong Duterte-Duterte tandem sa 2028 Presidential Elections, human nga nabaniog nga modagan pagka-bise presidente ang kanhi pangulo.
Apan gibutyag ni Panelo nga mas nakatutok karon ang kanhi Pangulo sa midterm elections labi na nga nauna nang nabutyag nga magpapili sab isip pagka-senador si Congressman Paolo Duterte ug Davao City Mayor Sebastian "Baste" Duterte.
Gidugang ni Panelo nga kung modagan gayud sa pagka-senador ang kanhi presidente mahimong magpapili gihapon pagka-mayor sa Davao City si Baste.
Giingong kulbahinam sab kini nga eleksiyon alang sa taga Davao City gumikan dunay mga huhungihong sa social media nga giingong mopapili sa pagka-mayor sa Davao City si Karlo Nograles, apan dili pa kini kompirmado.
Sumala sa lungsuranon nga si Marcial Cuesta, 61-anyos, taga Brgy 45-D, Davao City nga kung modagan si Mayor Baste sa pagka-mayor ug kung atbangan kini ni Nograles naa kuno’y purohan nga modaug si Nograles.
“Lagmit lang ha, kung mahitabo nga modagan si Baste sa pagka-mayor, segurado nga atbangan gyud ni ni Karlo Nograles, daug si Karlo, pero ayaw ka kay kung mahibal-an nga modagan si Karlo, ang moatbang ani si Digong gyud, so intonsis, pildi kaayo si Karlo,” panaghap ni Cuesta nga nahinabi sa SuperBalita Davao kagahapon.
Kagahapon, sayo sa buhatan sa Commission on Elections (Comelec) sa Ramon Magsaysay Park si Cong. Duterte kinsa giubanan ang anak nga si Rodrigo "Rigo" Duterte II nga mi-file sa certificate of candidacy (COC) niini alang sa pagka-konsehal sa Unang Distrito sa Davao City.
Hinuon, hangtud pa Martes sunod semana, Oktubre 8, ang pagduso sa COC alang sa midterm elections. (JPC)