Gatusan balay sa Brgy. Leon Garcia nasunog

Gatusan balay sa Brgy. Leon Garcia nasunog
(Hulagway ni Ry Llanes)

GATUSAN ka mga balay ang naabo human nahitabo ang upat ka oras nga sunog nga niulbo sa tulo ka mga lugar sa Barangay Leon Garcia, Davao City, sayo sa buntag kagahapon, Miyerkules, Disyembre 27, 2023.

Sa Purok San Vicente lang, 350 ka mga balay ang gilamoy sa kalayo kon diin moabot sa P1.1 milyon kantidad sa danyos gikan sa gatusan ka mga pamilya subay sa pagkompirma ni Barangay Captain Lita Empis sa paghinabi kaniya sa radyo.

“Sa pagkakaron, dili pa namo matansiya [ang total] basta naay isa ka purok nga hurot jud siya - ang Purok San Vicente. Naa na sa 350 ang mga balay diha. Kasagaran sa mga balay diria mga light materials,” butyag ni Empis.

Sa inisyal nga imbestigasyon sa Bureau of Fire Protection-Davao Region (BFP-Davao Region), ang sunog giingong "electrical ignition" tungod sa ni-overheat nga apliances sa usa ka Ron-Ron Asarabia.

Sukad sa pagsuwat ning balita, padayon ang City Social Welfare and Development Office (CSWDO) nga nakig-koordinar uban sa barangay unit sa Leon Garcia ug wala pa makapagawas og "verified reports" tungod kay padayon pa ang pagsusi tungod sa ihap sa mga pamilya, indibiduwal nga naapektuhan sa insidente, ug mga propedad nga nadanyos.

Sa kasamtangan, ang nadislokar nga mga pamilya gipahimutang na sa Congressman Manuel M. Garcia Elementary School duol sa barangay.

Sa Disyembre lang, ang Team Davao Rescue nakaresponde na og mga 11 sunog nga nisumada og kapin 580 sunog sa 2023, mas taas sa 503 sa kanhi tuig nga natala sa BFP-Davao Region.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph