Hubog nanion og sundang, gipusasan

Hubog nanion og sundang, gipusasan
(Hulagway iya sa Carmen Police)

GIDAKOP ang usa ka lalaki nga gireklamong hubog samtang nagmaoy sa Barangay Alejal, Carmen alas 8 sa gabii, Sabado, Hunyo 1, 2024. Ang suspek giila nga si alyas Nilo samtang ang nahimong biktima, mao si alyas Jun, pulos molupyo sa Barangay Alejal, Carmen.

Base sa inisyal nga imbestigasyon, ang suspek niadto sa lawak sa biktima nga iyang bayaw nga matud pa hubog samtang nagsinggit-singgit nga nangita sa biktima.

Matud pa nga ang biktima migawas gikan sa iyang lawak sanglit magkauban ra man sila sa suspek sa usa ka balay ug sa paggawas niya giingong nasuko ang suspek ug naghulga kaniya nga patyon dungan sa pagtion sa gihuptang sundang ngadto sa biktima.

Gibutyag nga ang biktima, nanawag og tabang ngadto sa mga barangay tanod hinungdan nga naaresto ang suspek ug gidala sa buhatan sa kapulisan uban sa sundang nga gibana-banang adunay gitas-on nga 50 centimeters gikan sa kahoy nga pul-an nga nagsilbing ebidensiya.

Anaa karon sa kustodiya sa Carmen Municipal Police Station ang suspek alang sa tukmang disposasyon. (DTV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph