KIDAPAWAN CITY -- Hustisya ang singgit sa tag-iya sa iro nga gipusil patay sa giingong pulis alas 2:00 sa hapon, Dominggo, Enero 21, 2024, sa siyudad.
Giila ang iro nga si Brodie, 4-anyos nga gipanag-iyahan ni Colenn Alonsagay Yuro nga taga Purok 2A Mangosteen, Barangay Lower Manongol, Kidapawan City.
Matud ni Yuro nga naa sila sa ilang uma ug sa ilang pag-uli, patay na ang ilang binuhing iro.
Gikompirma sab ni Yuro base sa asoy sa ilang pamilya nga ang ilang silingang pulis nga nadestino sa Davao Region maoy mipusil kang Brodie.
Gidugang niini nga diriyot pa maigo ang bata nga kauban sa iro niadtong mga orasa atol sa pagpamusil sa pulis.
Kung dunay sala ang iro, ireklamo sa tag-iya aron mapitol ug dili pusilon nga dakong kalapasan sa Animal Welfare Act.
Wala pa hinganli ni Yuro ang pulis ug wala pa kini tubag nganong gipusil niya ang iro.
Gisugyutan sa mga dog lovers si Yuro nga ipa-blotter sa M’lang Municipal Police Station ang hitabo aron mapasakaan og tukmang kaso ang giingon nga pulis nga namusil patay sa iro. (Edgar E. Fuerzas)