IPASAKA ang kasong pagpatay batok sa anak nga niluba patay sa iyang inahan alas 7:00 sa gabii niadtong Biyernes, Oktubre 11, 2024, sa Kidapawan City.
Giila ang biktima nga si Kagawad Mila Cinco sa Barangay Gayola samtang ang suspek mao ang iyang anak nga si Balong Cinco.
Gibutyag ni Kidapawan City Chief of Police, Lieutenant Colonel Dominador Nalgan Jr. nga hubog nga miuli ang suspek sa ilang balay sa Purok 6, Barangay Gayola, Kidapawan City.
Gibuyag matud pa sa inahan nga biktima ang anak nga dili magsiyagit-siyagit kay makatugaw sa ilang mga silingan.
Apan kalit nga nasuko si Balong nga dunay problema sa pangisip ug gipuspusan sa binughang kahoy ang iyang inahan sa makadaghang higayon.
Ang biktima, kinsa kanhi kapitan sab sa maong barangay, nalup-og sa yuta ug gitiwasan kini og dunggab sa suspek gamit ang mahait nga kutsilyo.
Sa dihang nakita ni Balong nga naligo na sa kaugalingong dugo ang iyang inahan, dali siyang nisibat paingon sa gumahan, unahan sa ilang balay.
Sa dihang dakpon na ang suspek sa mga sakop sa Barangay Peacekeeping Action Team (BPAT), misulay kini sa pagsukol kanila hinungdan nga gipusil ug naigo sa tiyan ug daling gihatud ngadto sa balay tambalanan.
Ang inahan namatay gilayon human makaangkon og grabeng mga bun-og ug samad dinunggaban sa kalawasan.
Balhog na ang suspek sa prisohan sa kapulisan sa Kidapawan City Police Station ug posibleng pasakaan og kasong parricide. (EEF)