Iro gihiloan, P200K natangag sa kawatan

DAVAO DEL NORTE — Dul-an P200 mil ang natangag sa wala mailhing mga kawatan dihang ilang giransak ang RDM 128 Lending Corporation sa Purok 4, Brgy. San Francisco, siyudad sa Panabo.

Gibutyag nga aron makasulod sa nahisgutang establisyemento, gipatay sa mga suspek ang bantay nga iro kon guard dog pinaagi sa paghatag og pagkaon nga dunay hilo.

Base sa inisyal nga imbestigasyon, sayo sa buntag usa sa mga empleyado sa nahisgutang establisyemento maoy naka-diskubri nga ang pultahan sa likod nga bahin abli ug guba na.

Nakita sab ang binuhing iro nga nagsilbing guwardiya nga patay na gumikan sa poisonous nga pagkaon nga gipakaon niini ug ang vault sa establisyemento nabuak na.

Matud pa nga sa dihang gi-review ang kuha sa closed circuit television (CCTV) camera, nakita ang duha ka wala mailhing mga lalaki nga parehong nagsul-ob og kolor pula nga sweat-shirt ug kolor gray nga hoodie nga dunay facemask, nagdala’g duha ka mga crowbars nga misulod sa nahisgutang establisyemento.

 Makita sab nga pugsanong giablihan ang vault gamit ang gibitbit nga mga crowbars ug gitangag ang kwarta nga balor P186,955.00 ug 12 kabook nga ATM cards.

Dugang gibutyag nga gawas sa maong duha ka mga kawatan duna pay laing usa nga nagpabilin sa gawas nga maoy nagsilbing look-out.

Dugang pagpanubay ang gilusad sa kapulisan sa Panabo sa tinguha nga mailhan ug madakpan ang mga responsable.