Kano, 2 Pinay dakpan sa buy-bust

KASONG pagsupak sa Republic Act 9165 kun Comprehensive Dangerous Drug Act of 2002 ang atubangon sa usa ka American national ug laing duha pa ka Pinay nga kauban niini human madakpi atol sa buy-bust.

Ang operasyon gipangunahan sa Philippine Drug Enforcement Agency-Davao Region (PDEA 11) ug sa Davao City Police Office (DCPO) sa Diamond Avenue, Executive Homes, Barangay Pampanga, alas 9:24 sa gabii, Martes, Agosto 27, 2024.

Giila sa PDEA 11 ang suspek nga si alyas James, 74-anyos, langyaw kinsa napalitan og usa ka pakite sa gituohang pinaugang dahon sa marijuana nga mokantidad og P1,000.

Atol sa buy-bust operation naaktuhan sa awtoridad ang duha ka babaye nga Pinay nga sila alyas Diana ug alyas Ethel, pulos hamtong ang pangedaron, hinungdan nga giapil sila og dakop.

Nakumpiska gikan sa posisyon sa mga dinakpan ang usa ka cartridge sa THC Vape, duha ka sealed bottles dunay unod nga marijuana oil ug 23 ka pakite dunay unod nga pinaugang dahon sa marijuana.

Nakuha sab ang daghang "sex toys" diin gituohang ginapagamit sa American national sa mga babaye sa ilang posibleng aktibidad nga cyber-sex, apan padayon pa kining giimbestigahan sa awtoridad.

Sumala sa awtoridad nga nakadawat sila og impormasyon gikan sa nagpakabana nga lungsuranon hinungdan nga ilang gikasa ang buy-bust.

Sa nahitabo, ang Bureau of Immigration (BI) Davao Region gipahibalo na sa awtoridad labot sa maong langyaw. (JPC)