MALAMPUSON nga nadakpan sa ginsakpan sa Station Drug Enforcement Unit (SDEU) sa Sta. Ana Police Station ang usa ka 29-anyos nga lalaki sa gilusad nga anti-illegal drugs operation sa Alley 12, South San Juan, Barangay Centro, Agdao District, Davao City ala 1:17 sa kaadlawon Biyernes, Oktubre 18, 2024.
Sa maong operasyon nasakmit sa mga pulis ang mokabat sa P148,648.00 nga balor sa shabu base sa standard drug price (SDP) gikan sa dinakpan nga si alyas Den-den, 29-anyos, window installer, molupyo sa Nagsil Village, Brgy. Centro, Agdao District, Davao City.
Narekober gikan sa suspek ang usa (1) ka buok nga heat sealed transparent plastic nga gituohang shabu bugti sa minarkahan nga kuwartang tinuod nga P1,000 nga papel ug laing upat (4) ka P1,000 nga printed machine copy isip mga buy-bust money.
Sa dihang gihimo ang pagrekisa, nakuha na sab sa pulis ang usa ka coin purse, kolor pula nga dunay sulod nga upat (4) ka buok nga heat-sealed transparent plastic sachets nga gituohang nagbaton og shabu, apil na ang buy-bust money.
Sa pagsuwat ning balita, ang suspek gikustodiya na sa Sta. Police Station alang sa booking process, samtang mga ebidensiyang nasakmit ipailawom sa eksaminasyon sa Davao City Forensic Unit ug ang non-drug nga mga butang gitakdang itunol ngadto sa custodian sa mga ebidensiya. (Wenz G. Mendoza)