ANAA karon sa "hot seat" ang usa ka police colonel sa Police Regional Office-Soccsksargen (PRO-12) sa General Santos City tungod matud pa sa reklamong sexual nga pangabuso sa babayeng sakop sa kapulisan.
Kini subay sab sa taho gikan sa Camp Crame ug PRO-12.
Matud sa tigpamaba sa PNP nga si Brigadier General Jean Fajardo nga ang Police Colonel nga wala niya hinganli anaa na sa Personnel Holding and Accounting Unit samtang gihimo ang imbestigasyon.
Gisulti sab ni Fajardo nga gisugdan na sa Regional Internal Affairs Service 12 (RIAS-12) ang imbestigasyon sa maong kaso aron mawala ang mga pagduda nga dunay nahitabong whitewash sa insidente.
Mga imbestigador sa Camp Crame, gitakdang moabot sa Rehiyon 12 aron makisusi sa biktima sa gisang-at ni nga reklamo alang sab sa ilang parallel investigation sa kaso.
Gikompirma ni Fajardo nga ang Police Colonel gireklamo usab og sexual harassment sa iyang mga kauban nga babaye sa dihang nadestino pa kini sa Rehiyon 11.
Gipasalig ni PNP-12 Regional Director Brigadier General James Gulmatico nga walay mahitabong whitewash sa imbestigasyon sa maong opisyal. (EEF)