MIUBOS sa 34 porsiyento ang kaso sa lugos sa dakbayan sa Davao gikan sa bulan sa Enero hangtud Mayo karong tuiga itandi sa samang bulan sa miaging tuig 2023.
Kini subay sa gipagula nga datus sa Davao City Police Office (DCPO) kagahapong adlawa, Hulyo 22, 2024, diin makita nga anaa na lamang natala nga 41 rape cases ang maong mga bulan itandi sa rekord nga 62 ka mga kaso sa samang mga bulan sa 2023.
Sumala ni DCPO spokesperson Police Captain Hazel Tuazon nga bunga kini sa paningkamot sa kapulisan pinaagi sa police visibility ug ang ilang information dissemination campaign ug pagpakabana sa mga lungsuranon.
Subay sa datus, ang Sta. Ana Police Station 1 ang dunay taas nga rekord nga dunay napulo sa kaso sa 2023 sa samang bulan ug dunay pito ka kaso sa 2024 sa samang panahon.
Gisundan kini sa Talomo Police Station 3 nga dunay tag-unom ka kaso sa samang mga bulan, ug gisundan sa San Pedro Police Station, Buhangin Police Station, Toril Police Station, gisundan sa Police Stion 13, Police Station 15 ug ang Police Station 17.
Sa maong mga bulan ning tuiga, wala na say natala sa Buhangin PNP, sa Police Station 13, Police Station 15 ug sa Police Station 16.
Sa ihap nakarga pa ang linuog nga paglugos-patay kang Architect Vlanche Marie Bragas niadtong Mayo 16, 2023 kinsa misakay sa bao-bao ug gidala sa sangingan sa Fausta, Calinan, Davao City.
Napanamastamasan ang biktima diin una nang gibutyag nga dihang napalgan ang biktima.
Giingon ni Capt. Tuazon nga ipadayon sa mga bag-ong station commanders sa DCPO ang maayong nasugdan sa 19 ka mga station commanders nga gipang-relib.
Police visibility diha sa publiko ang gipakusgan karon nga kampanya sa DCPO ilawom sa bag-ong Acting City Director, Police Colonel Hansel Marantan.
Sumala ni Captain Tuazon nga mas gipakusgan pa ang police visibility aron maseguro nga anaa sa luwas ang publiko.
Sa karon ang matag eskuwelahan duna na’y mga pulis sa gate ug daghan sab nga mga pulis ang gipakatag sa mga palengke ug ubang mga lugar nga mas dagsaon sa mga tawo.
Gidugang sab sa opisyal nga ang nauna nang police bike roving patrol naa gihapon ug mas gipakusog pa kini. (Jeepy P. Compio)