Katawhan gipasidan-an sa posibleng landslide, baha

Katawhan gipasidan-an sa posibleng landslide, baha
(DOST-Pagasa)

SUBLI na sab nga nagpasidaan ang Office of the Civil Defense-Davao Region (OCD-Davao) sa mga tawo nga namuyo duol sa kabukiran ug kasapaan sa posibleng peligro nga dala sa easterlies weather system.

Gikanayon ni Franz Irag, ang operations officer sa OCD-Davao, atol sa usa ka radio interview, Miyerkules sa hapon, Enero 3, 2024, nga ang padayong pag-ulan dala sa easterlies moresulta sa kalit nga mga pagbaha ug landslide sa Davao Region.

“Padayon lang ang amoang pahimangno sa atong mga kaigsoonan labi na tong nagpuyo sa mga bahaon ug mga bakilid nga lugar nga ilado nga landslide prone area nato diri sa region 11,” pasidaan ni Irag.

Dugang ni Irag nga gawas sa landslide nga hitabo sa Maragusan, Davao de Oro, niadtong Enero 2, duna say landslide nga namonitor sa Mati City sa national road, apan walay pamilya nga naapektuhan ug gihimo na ang clearing operations.

Tungod niini, ang buhatan hugot nga nagmonitor ug nakigkoordinar sa barangay o sa lokal nga panggamhanan sa ilang Disaster Risk Reduction and Management (LGU-DRRM) alang sa notipikasyon, ug kung duna ba'y panginahanglan sa pre-emptive evacuation nga ipatuman gilayon.

Samtang ang buhatan kanunay nga nagtutok sa mga munisipyo sa Manay ug Caraga, Davao Oriental tungod kay sulod kini sa erya nga grabeng naapektuhan sa Tropical Cyclone Kabayan. Matud ni Iraq nga sukad Enero 3, wala nay bakwit nga nahabilin sa evacuation centers.

Apan bisan pa og wala nay bakwit sa mga centers, ang OCD-Davao padayon nga naghatag og tabang pinaagi sa Department of Social Welfare and Development-Davao Region (DSWD-Davao).

Ang buhatan mopagawas na sab og mga 4,000 packs sa bugas gikan sa National Food Authority (NFA) ngadto sa mga molupyo sa Munisipalidad sa Caraga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph