Kawatan nag-trending sa Facebook

TRENDING karon sa mga posts sa Facebook ang usa ka lalaki nga nadakpan human nga nangawat og manok pangsabong.

Alas 11:30 sa gabii niadtong Lunes, Agosto 26, 2024, sa Barangay Cabantian, nadakpan ang suspek nga si alyas Mark, 22-anyos, mason, lumad nga taga Agusan del Sur kinsa temporaryong nagpuyo sa Barangay Cabantian, Buhangin District, Davao City.

Una niini, nakamata ang tag-iya sa manok pangsabong sa kasaba sa iyang mga manok sa nataran niini kilid sa ilang balay.

Dihang giukoy sa tag-iya kinsa naay sa manukan, iyang nakita ang suspek nga nagdala og t-shirt diin iyang gibalot niini ang manok pangsabong.

Daling midagan sa tag-iya padung sa suspek ug iya kining nagunitan dayon nangayo'g pakitabang sa iyang mga kabanay hinungdan nga maayong pagkasikop sa suspek.

Gilayong miabot ang kapulisan sa Buhangin Police Station ug gidala ang suspek sa presinto kinsa giandam ang kasong theft nga ipasaka kaniya ngadto sa korte.

Saysay sa dinakpan, iya sab kuno nga ibaligya ang manok sa iyang mga kailang sabungero.

Giangkon sab sa suspek nga daghan na niya kining higayon nga ginahimo sa bisan asa nga lugar.

Dihang na-post ang suspek sa social media, nagbaha ang mga comments ug shares sanglit daghan og kaila ang suspek nga gituohang mga sabungero nga namalit kaniya og manok. (JPC)