GISUSPENSO ang klase sa usa ka pribadong tulunghaan sa Compostela, Davao de Oro niadtong Lunes, Nobiyembre 20, 2023.
Kini human sa giingong napulo ka mga estudyante ang nasudlan og dautang espiritu.
Gibutyag sa usa ka inahan nga nagpatago sa iyang ngalan kansang anak nagtungha sa maong eskuwelahan nga sa wala pa mahitabo ang giingong kalisang, ang Grade 9 student nakakika og usa ka bata sulod sa classroom ug laing estudyante sab ang nahadlok sa anino nga iyang nakita sulod sa kasilyas.
Tungod niini, gipahulagway sa usa ka personalidad sa eskuwelahan ang Grade 9 student pinaagi sa pagpa-drawing sa iyang nakita nga bata. Apan pipila ka segundos ang milabay samtang nag-drawing kini, hinay-hinay nang nasudlan matud pa og dautang espiritu ang mokabat napulo ka mga estudyante gikan sa nagkalain-laing level sa maong tunghaan.
Tungod niini, daling gisuspenso ang klase ug gipapauli ang mga estudyante.
Giingong ang grupo sa HEC, usa ka relihiyusong pundok maoy niadto sa tunghaan ug nitabang sa mga estudyante nga giingong nasudlan og mga dautang espiritu.
Samtang usa ka wala magpaila nga inahan nadismaya sa tagdumala sa eskuwelahan sanglit giingong nagpakahilom ug wa magpatabang sa lokal nga panggamhanan sa lungsod.
Matud pa gidid-an sab ang ilang mga estudyante nga isugilon sa gawas ang nahitabo sa eskuwelahan.
Sa pagsulat ning maong balita, wa pa magpagawas og opisyal nga pahayag ang tagdumala sa tunghaan gawas lang sa na-post sa ilang opisyal Facebook page nga nagpahibalo nga suspendido ang klase sa maong adlaw.
Abli kanunay ang Superbalita Davao aron nga madungog ang habig sa eskuwelahan sa nahisgutang hitabo.
