GISUSPENSO ang mga klase sa mga eskuwelahan sa daghang barangay sa M'lang, Cotabato Province human nga gibahaan tungod sa halos usa ka gabii nga pagbunok sa kusog nga ulan, Oktubre 2, 2024.
Samtang dili lang katawhan, apan apil na sab kahayopan, pananum ug kabalayan ang gihasol sa baha.
Gitaho ni Barangay Sangat Kapitan Rolando Boteros sa M'lang nga kutob sa tuhod ang baha ang nasinati sa pipila ka bahin sa ilang lugar ilabi na kadtong nanimuyo duol sa mga sapa.
Mao usab kini ang hinungdan nga ang Sangat Elementary School gideklarang way klase kagahapon, Huwebes, gumikan gilunopan sab ang eskuwelahan.
Giingong usa ka kabaw ang namatay sa Barangay Langkong tungod kay naanod ug nalumos sa baha.
Gipahimangnoan ni Kapitan Boteros ang mga molupyo ug mga estudyante sa iyang barangay nga magpabilin sa ilang mga balay.
Samtang gipahibawo sab ni Brgy. Dugong Kapitan Noah Zabel nga suspendido ang klase sa ilang barangay tungod sa baha.
Halapad nga kahumayan ang apektado sab sa pagbaha nga posibleng makaapekto sab sa ani unya sa mga mag-uuma.
Sa laing bahin, gitaho sab nga gibaha sab ang ubang mga barangay sa maong lungsod sama sa Buayan ug Dalipe.
Gisuspenso sab ang mga klase sa M'lang National High School human gibahaan ang tunghaan. (EEF)