TUNGOD sa tumang kainit sa panahon karon nunot sa El Nino, ubay-ubay ka mga lugar sa nasud gipili nga isuspenso ang ilang klase alang sab sa kaayuhan sa mga estudyante.
Dinhi sa Mindanao, ang General Santos City ug Munisipalidad sa Tantangan misuspenso sa ilang klase alang sa kaayuhan sa mga estudyante nila.
Ang LGU sa General Santos City mipaguwa sa Executive Order No. 19, Series of 2024 or "Executive Order declaring suspension of classes at all levels in both public and private schools in the City of General Santos."
Ang pagsuspenso sa klase gikan Abril 2 ngadto Abril 5, 2024, apan kini mamahimo nga maextend o malibgas ra sab.
Kabahin niini gimando ang pagsagop sa alternatibong pagtudlo sa kabataan sama sa paggamit og modules, performance tasks, pagpahimo og proyekto o make-up class nga nahisubay sa Deped Order No. 037 Series og 2022.
Samtang gisuspenso sab ang face-to-face afternoon classes sa tanang lebel sa Tantangan, South Cotabato nga molungtad sugod April 1 hangtod Abril 15, 2024.
Sa kabahin ni Tantangan, Mayor Timee Torres-Gonzales, buot lamang nila nga masiguro ang kaayuhan sa mga estudyante.
Ang mayor midugang nga ang LGU ug DepEd nagkasabot nga ipatuman una ang blended ug alternative learning modalities, samtang pabiling suspendido ang face-to-face classes matag hapon.
Gidugang sa mayor, gisiguro usab sa DepEd nga dili malangan ang homework sa mga tinun-an.
Sa lungsod sa Banga, gisuspenso usab ni Mayor Evangeline Palencia ang klase matag hapon hangtod Abril 30.
Gitun-an sab sa ubang lungsod sa Rehiyon 12 ang pagsuspinde sa klase gumikan sa grabeng kainit o hulaw. (Rhona G. Villariasa/Edgardo E. Fuerzas)