DAUT nga linya sa kuryente o faulty electrical wiring maoy gitumbok nga hinungdan sa pagdilaab sa dakong kalayo nga milamoy sa kombento sa madre alas 6:40 sa gabii, Sabado, Nobyembre 11 sa Datu Piang, probinsiya sa Maguindanao del Sur.
Gibutyag ni Datu Piang acting fire mashall Inspector Zulficar Caseres nga nakadawat sila og taho sa natigayon nga sunog sulod sa Notre Dame of Dulawan Inc (NDDI) sa Barangay Poblacion, Datu Piang, duol sa simbahan sa Katoliko.
Abtik nga nagresponde ang kabomberuhan ug Chinese Fire Brigade nga nagtinabangay sa pagpalong sa kalayo.
Gama sa kahoy ang kombento sa mga madre hinungdan nga dali kining gilamoy sa kalayo.
Gidugang ni Caseres nga wala maapektuhan ang tulunghaan ug simbahan gawas sa kombento.
Wala pa matino ang danyos sa sunog ug nagpadayon pa ang imbestigasyon sa BFP-Datu Piang.
Nagpasidaan si Caseres sa publiko nga sundon ang fire safety precautions aron malikay sa sunog.