ATRASO sa druga ang gilantaw nga motibo sa otoridad sa pagpusil patay sa usa ka lalaki alas 3:00 sa kadlawon, Huwebes, Abril 25, 2024, sa General Santos City.
Ang biktima giila nga si Michael Crisostomo, 41, minyo, nagpuyo sa Purok San Juan, Barangay West, General Santos City.
Gibutyag ni General Santos City Police Director Colonel Niocomedes Olaivar nga nagtindog ang biktima gawas sa iyang balay dihang kalit nga niabot ang duha ka wala mailhing tawo ug gipusil siya gamit ang kalibre .45 nga pistola.
Dali sab nga miikyas ang mga suspek sakay sa motor.
Namatay dayon si Crisostomo human makaangkon og ubay-ubay ka samad pinusilan sa lawas.
Sa pagrekisa sa mga opisyal sa barangay ug kapulisan ngadto sa biktima, nakuhaan nila kini og usa ka kalibre .45 nga pistola, mga bala ug magasin lakip na ang pakete sa shabu.
Padayong gihimo sa otoridad ang imbestigasyon sa kaso. (Edgardo E. Fuerzas)