GENERAL SANTOS CITY -- Upat ang grabe, samtang laing 11 pa ka mga tawo ang naangol human nibalit-ad ang footbridge sa Barangay Suyan Road, Malapatan, Sarangani Province niadtong miaging adlaw.
Matud ni Malapatan Mayor Salway Sumbo nga puno kaayo sa mga tawo ang footbridge nga miagi hinungdan nga nabaliktad ug nahulog ang mga biktima.
Gikanayon niini nga upat ka ambulansiya ang niresponde nga gipangulohan sa Malapatan Municipal Disaster Risk Reduction and Management Office.
Bisan pa nga giingong 25 ka tiil ang gitas-on sa nahisgutang latayan, nagpasalamat usab ang opisyal tungod kay dunay tubig ang suba sa ubos niini hinungdan nga walay nakalas nga kinabuhi.
Gipasalig sa opisyal nga ayohon ang latayan aron nga subling maagian sa mga tawo.
Sa pagkakaron, lahi na nga rota ang agian sa mga tawo samtang giplastar pa ang pag-ayo sa footbridge.
Nasayran nga sa 15 nga naangol, 11 niini nakagawas na sa balay tambalanan human maseguro nga maayo na ang ilang kahimtang. (Edgar E. Fuerzas)