MATI CITY, Davao Oriental — Liboan ka mga residente sa Barangay Dahican ang nakadawat og tag-diyes kilos nga bugas gikan sa City of Mati LGU kagahapon, Valentine's Day.
Ang pagpanghatag og bugas kabahin sa desisyon ni Mayor Michelle Nakpil Rabat nga mohatag og ayuda alang sa tanang pamilya sa Mati gumikan sa sagunsong pagbaha nga nakaapekto sa mga Matinians sa milabay nga mga semana.
Nagsugod ang pagpanghatag sa bugas niadtong Pebrero 10 kon diin nahatagan na ang mga residente sa Barangay Lawigan, Tamisan, Bobon, Don Martin Marundan, Buso, Tagbinonga, Taguibo, Culian, Sanghay, Danao, Libudon, Macambol, Mamalit, Dawan, ug Dahican.
Nagpundo og 60,000 foodpacks ang City of Mati LGU alang sa mga pamilyang Matinians nga dunay balor nga P33 milyon.
Lima ang distribution areas sa Dahican nga mao ang barangay hall covered court, NHA covered court, Kaligoan covered court, Urban covered court, ug Sambuokan covered court.
Gipangunahan ni Mayor Rabat ang distribusyon uban ni Dahican Barangay Kapitan Eric Rabat.
Dakong kalipay sa mga nakadawat og bugas sa Valentine's Day tungod kay alang kanila mas importante ang bugas kumpara sa bulak ug tsokolate.
Nakahatag na og 15,442 ka tag-diyes kilos nga bugas ang City of Mati LGU subay sa Pebrero 13 nga datos sa Mati City Social Welfare and Development Office. MATI CIO