LYR mohatag og ganti makatudlo sa suspek sa tulis sa Tagum City

SI  Larry Y. Rubinos (LYR) ang nailang ‘business tycoon’ sa Siyudad sa Tagum.
SI Larry Y. Rubinos (LYR) ang nailang ‘business tycoon’ sa Siyudad sa Tagum.Hulagway gikan sa KTA Facebook page pinaagi ni Dexter T. Visitacion.

DAVAO DEL NORTE —  Tunga sa milyon ka pesos (P500,000.00) ang gitaganang pahalipay o ganti gikan kang Larry Y. Rubinos (LYR) ang nailang ‘business tycoon’ sa Siyudad sa Tagum sa makatudlo sa suspek nga mitulis sa gipanag-iyahan niyang gasoline station.

Kini ang giluwatang pamahayag ni Rubinos human sa nahitabong tulis sa Gas Island Gasoline Station sa Brgy. Canocotan sa Siyudad sa Tagum nga diin mokabat sa P109,000.00 ang natangag nga kuwarta sa tulisan gikan sa empleyado sa nahisgutang gasolinahan nga mag remit unta niadtong higayona sa halin.

Hinuon gibutyag nga nakuhaan sa closed-circuit television (CCTV) Camera ang maong panghitabo nga giingong makatabang og dako sa pagsulbad sa kaso.

Samtang sa laing bahin, gawas sa maong tulis nga nahitabo sa Gas Island Gasoline Station, gitulis sab ang JRS Express, Tagum Branch  sayo sa buntag niadtong Disyembre 7, 2023. 

Ang maong branch sumala pa mao pay pag-abli niadtong adlawa dihang gitulis nga diin matud pa sa hepe sa Tagum City Police Station nga si Police Colonel Jeffrey Latayada gamay’ng kantidad lamang ang nadala sa wa mailhing tulisan nga giigong daling misibat sakay sa motorsiklo.

Sa samang adlaw, giingon nga dunay nahitabong hold-up sa Orchard Cemetery sa Brgy. La Filipina ug pangpanglabni og selpon sa mao gihapong barangay.

Ang katawhan sa siyudad lakip sa mga kasikbit nga mga probinsiya nga buot mobisita sa siyudad subling gipahimangnoan sa kapulisan nga sa kanunay mag-igmat ug magmabinantayon alang sa kaugalingong kaluwasan. 

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph