KIDAPAWAN CITY -- Giunay og ihaw ang mag-uuma sa iya mismong silingan ug katagay alas 5 sa hapon, Miyerkules, Enero 3, 2024, sa Tulunan, probinsiya sa Cotabato.
Giila ang biktima nga si Jay-ar Gabay, 31, minyo ug nagpuyo sa Barangay Bacong, Tulunan sa maong probinsiya. Samtang ang suspek mao si Jesalio Malit Guanday, 28, ug minyo.
Gibutyag ni Cotabato Police Provincial Office Director Colonel Harold Ramos nga nag-inom ang magsilingan sa usa ka tindahan duol sa ilang gipuy-an.
Sa dihang nangahubog na ang duha, kalit lang naglalis sa daan nilang bikil nga nisampot sa pagbinayloay og mga mahait nga pulong.
Wala maka-agwanta ang suspek sa sobrang kasuko hinungdan nga nagmaoy dungan og tigbas sa biktima gamit ang mahait nga sundang.
Patay gilayon si Gabay nga nakaangkon og mga samad tinigbasan sa ulo,a likod ug ubang parte sa lawas.
Hinuon, mitahan dayon si Guanday sa mga sakop sa Barangay Peacekeeping Force and Action Team (BPAT) nga mao na'y nitunol kaniya ngadto sa kapulisan.
Tingkagol na ang suspek sa prisohan sa Tulunan Municipal Police Station alang sa kasong atubangon niini ngadto sa korte.